Lahat Hotline
Related Articles
LAHAT, LhL – Cerite meribangkah, datang isak di jeme Badan Kepegawaian Daerah (BKD) Pendidikan dan Pelatihan (Diklat) Kabupaten Lahat. Ujinye mula’i tanggal 4, 5 ngak tanggal 8 bulan diarap (Juli) taun 2016 ni, atau kire-kire 2 minggu agi. Gegale pegawai negeri di lahat ni ka di peraikah gale. Kabar ni dikicekkah uli pelaksana tugas (Plt) bos BKD tu, Nasrun Aswari SE MM, melalui Sekretarise, Ir Nyimas Zuairiah Aini. “Ngguk nian, di tanggal 4, 5 ngak tanggal 8 Juli tu, aghi kite perai seghempak, gunenye kandik nyambut aghi riaye Idul Fitri 1437 H,” uji Nyimas, waktu di gaghi li tukang berita, aghi Jum’at (17/8) baleng kemahi.
Ketentuan ni, di umongkah Nyimas. Kene lah ade surat Menteri Pendayagunaan Aparatur Negara dan Reformasi Birokrasi (Menpan RB) No B.2603/M.PAN-RB/8/2015, ye dikeluaekah tanggal 11 Agustus taun 2015 sebitu. Disurat itu ngatekah, amun tanggal ye disebutkah tadi kite melaksanekah aghi riaye nga perai seghempak taun 2016 ni. “Udem tu dilajukah pule ngak surat Pak Bupati Lahat No 800/750/BKD.D/2015. Amun surat tu lah kami idarkah gale ke kantor-kantor pegawai ye ade di lahat ni”, ujinya.
Nyimas ngatekah pule, bahwasanye perai seghempak selame 4 aghi tu, lah di riken ngurangi hak perai atau cuti taunan pegawai. Jadinye gi delapan aghi tulah ye pacak diambek kebile kine sesuai ngak ketentuan peraturan perundang-undangan nye belaku. “Ketentuan perai seghempak ini, lah dirasankah dan diputuskah tige menteri, dek belaku nga ASN yang gawehnye ngajari budak sekolah alias guru dan dosen, kene rabanan itu lah ghule perai nurutkah aturan pasal 8 PP No 24/1976 tentang cuti PNS,” itu dijabarkah Nyimas.
Udem tu, bagi unit atau badah penggawehan organisasi nye befungsi ngenjukkah layanan langsung nga masyarakat, lok ghumah sakit, puskesmas, pelayanan jeme nak nelepon, listrik, ayek minum, blangwer, keamanan dan ketertiban, jeme begawe di bank, perhubungan nga unit pelayanan ye sejenis. Bos di unit nye besangkutan tu pacak-pacaklah ngatur penggawehan pegawaiye, mangke pelayanan nga masyarakat banyak tu pacak bejalan pule. “Lain di itu, setiap bos di instansi pemerintah, supaye ngatur nga nginak’i gawehan pegawainye selame aghi perai besame tu. Amun ade pegawaiye dide masuk begawe ngak alasan dek bekeruanan, kendaknye harus ngambek langkah kandek ningkatkah kedisiplinan pegawainye tulah”, Uji Nyimas, ngudemi umongannye.
Tukang Berita : (UJANG)
