Lahat Hotline
Related Articles
Tukang Nulise : RONI
LAHAT, LhL – Bekaitan ngak rencane razia bebesaan mula’i pagi, aghi Rebu tanggal 1 nggok ke tanggal 21 bulan tige taon 2017 ni, nye kah digawehkan secare seghempak uli Koordinator Lalulintas (Korlantas) kepelisian Republik Indonesia, diwakili Plisi lalulintas Polres Lahat, make ade bebeghape patian isan di raban plisi tu, kandek same same diingatkah.
Patian sesame ini disampaikah li Bos Besak Plisi Lahat, AKBP Rantau Isnur Eka, SIK, meliwati Bos Plisi lalulintas bename AKP Dani Prasetya, SIK. Dani bepintak ngak adik sanak, jiran tetangge, rugok kampoh duson laman, bahwesenye senampur agi Satuan Plisi Lalulintas (Satlantas) kah ngadekah razia nye dinamekanye “Operasi Simpatik” sehempak selame 21 aghi.
Nah uli titulah, uji Dani, mangkenye jeme bemutor ngak bemubel nak matuhi peraturan lalu lintas. Misale, ame bemutor makai helm, ame ade lampu abang dang di simpangan berenti kudai,
“Jangan asak galak bae ngunyor dik keruan aguk tu, gunenye ndek ngurangi angke kecelakaan di bumi seganti setungguan ini. Udem itu ame dang bemutor atau bemubel nak nginak nginak ngak rambu rambu. Jangan pule sampai dek teghingat melengkapi surat-surat kenderaan bemutor, lok STNK ngak SIM tu, dibatak”, uji Dani.
Bukan pule itu saje, Dani ngulang ngumong, antak kah pegi bemutor atau bemubel tu, kinak’i kudai STNK ngak SIM tu tadi, jangan sampai lah mati. Ame mati, Dani ngajung perpanjanglah kudai, mangke dide jadi urusan.
“Bagi nye bemutor, pakai helm tu jangan pule asak galak. Pakai helm ye sesuai ngak Standar Nasional Indonesia atau (SNI), ame lum bedie mbeli kudai, dik kah mahal ige. Nye bemubil mak itulah pule, jangan lupe makai tali selimpang nye dikatekah jeme sabuk pengaman tu”, katenye.
Ade pule mubel ape mutor ye suaghe knalpot besak benagh tu. Raban plisi ni ngenjuk tau base suaghe knalpot besak tu mekak’i telinge tetangge, kalu pacak gentilah kudai ngak nye biase biase bae.
“Tujuannye, mangke dide ngaruk penganingan jeme banyak”, pesan plisi beulas blagak ni, Selasa (28/2),
Kepalak Plisi Lalulintas ni ngakok, base raban plisi ni bukan nak ncakagh penggawehan nye dek ghenang, bukan pule nak cecekagh kesalahan jeme. Sebab te tini memang lah ade peraturannye. Ame lah dienjuk tau lok ini, juji ughang ini, jangan nyalahkah plisi agi ame kene tilang. Base surat tilang tu kandek teguran dan nek keselamatan bagi jeme kite dusun laman.
“Memintaklah kite terus di lindungan Allah dan selamat dalam bekenderaan. Plisi ngadekah Operasi Simpatik ni, nek siape tini, cuka…?? Nek kite tulah. Apelagi ame adek sanak ade yang kelengitan mutor ape mubel, itulah gunenye ade plisi meriksei surat menyurat kenderaan di jalan tu. Jadi jangan purek atau tekanjat ame diberentikah ngak kene adang plisi. Lagi pule dide nak ghegak, ame dek bedie kesalahan dek kah ngape ngape mpok berenti”, imbau Dani.
Sumber : Kasat Lantas Polres Lahat
