Lahat Hotline
Related Articles
MULAK ULU, LhL – Pengujungannye, filam dak kecik bejuluk “Si Bolang Lahat” isak di Duson Geramat, Kecamataan Mulak Ulu nye diberitakah li media Lahat Hotline ni kemaghi, kah diligat jeme nian di taksiun tivi Tran7 ngepungan jam 13:00, atau kire kire jam satu siang pagi.
Filam nye diperankah li 4 ughang budak kecik sak di Duson Geramat bename M. Eldiansya (Bolang), ngak kekanceannye bename Lidwi Amigo, Anugera David Putra, Ishar Januarta ini, mimang lah lame nian dinanti nantikah li jeme Kabupaten Lahat ni, khususe adek sanak, rugok kampoh, deng beghadeng kite di Duson Geramat, Kecamatan Mulak Ulu ni.
Kerne filam ini disuteng li jeme isak di jakarta tu lah sebulan lebih, mangke ndengagh kah diligatkah jeme taksiun tivi Trans7 tu petang isok. Asenye digek tanyean adek sanak, nye meghase penasaran benagh nak nunton filam itu.
Sate tedengah jeme tuan taksiun tivi Trans7 tu kah meligat filam itu tengaghi pagi, injek anjam, kereribangan, kinak’an benagh di ulas raban budak budak nye ngikut beperan di filam itu. Temasuk pule masyarakat lahat ni, galak gale nak nuntone.
“Au nian, uji asisten produser filam sak di tivi Trans7 bename mbak Indah tu, kalu dek bie perubahan petang tengaghi pagi, Selasa tanggal 1-11-2016, kire kire jam 13:00 atau satu siang filam Si Bolang Lahat, Duson Geramat kah ditayangkanye. Akuni mpai udem nelepone tine itu petang tadi”, uji jeme bename Ivi Hamzah, lanang nye beperan jadi kakang Bolang di filam itu.
Sate kabar ini tedengagh li Kepalak Disa Geramat bename Sapuan, die langsung ngakok ribang. Ujinye die dide kah pegi kemane mane amun lom nunton film Si Bolang sak di Geramat tu.
“Pokok’e, aku kah ngajak adek sanak kite di duson ni nak nunton filam itu tengaghi pagi”, ujinye.
Ade pule Pak Miharta, Camat Mulak Ulu ni ngatekah die anjam nian pule ndengagh tuntonan alap di taksiun tivi tu tengaghi pagi.
“Kami kah nunton seghempak di kantor Camat Mulak ulu ni lah, mpak mpak’an ngak staf di kantor. Udem itu kami mintak ngak masyarakat di Kecamatan Mulak Ulu ni khususe, kalu pacak kite nginak aksi seru budak budak kite bejuluk Si Bolang dalam filam nye kah disiarkah uli tivi Tans7 jam satu wib siang pagi”, kate Miharta, waktu dikabari lik Ivi Hamzah ni.
Semegi pule ngak Ivi Hamsyah, lanang yang telibat langsung njadi kakang Bolang di filam ini ni, nincak nincak sate ndengagh filam Si Bolang Lahat sak di Duson Geramat ni kah di tayangkah jeme siang pagi tu. Amun uji die, filam ini lah di tunggu tunggukah benagh uli penggemar Si Bolang, film dak kecik Geramt yang musekkah mainan baghi daerah mulak ni.
“Ai…, kanye agi, katah anjame kami. Base filam ini pacak pule njadi ubat ghindu adek sanak, kundang kance kite ye dang di rantauan. Apelagi filam ini di jadikah media wisata, adat istiadat dan budaya daerah kite”, uji Ivi Hamzh ni, nggihem.
Gambare : (Simpanan kami)
Tulisane : (Jack Mania)
Editor : (UJANG, SP)
