Lahat Hotline
Related Articles
Tukang nulise : Jack Mania
MULAK ULU, LhL- Sate lah dinyatekah resmi kah njadi Kecamatan Mulak Sebingkai li Pemerintah Pusat di Jakarta, raban adek-sanak warge duson laman di Kecamatan Mulak Ulu lah keribangan gale, nek nyambut realisasi pemisahan kecamatan tu njadi due.
Temasuk raban pak rie (Kades) ngak pemerintah kecamatan serte warge lah begegas nyiapkah segale keperluan kandek kecamatan baru tu kele. Misalnye sekapan kandek kantor-kantor, ngak badah sekulahan pule lah disiapkah gale.
Saghi ni, Sabtu (29/7/17) gegale Kades sepuloh duson se-Kecamatan Mulak Ulu ngajak’i masyarakate begutong ruyong mbersihkah sekapan (Lahan) ye kah dibuat badah sekulahan SMK di duson Penandingan.
Lebih cete lagi, dang gutong ruyong tu ade pule Pak H. Harianto, SE, MM, MBA Sekda Lahat tughun ngikut nebasi sekapan itu. Warge dang begawe kerje bakti di lokasi itu, langsung ribang nyambut kedatangan Harianto nye dikancei pule lek pejabat isak di kecamatan. Camat Mulak Ulu, ade lagi Kapolsek Mulak Ulu.
Kabare Harianto ni mimang asale jeme isak di Kecamatan Mulak Ulu ndie, anye mak ini aghi lah njabat Sekda Lahat ni. Die ngakok ribang anjam nginak masyarakat marge duson laman di Mulak Ulu dang mbersihkah sekapan selibagh tengah due hiktar ndek badah SMK tu.
Dek ke kalu-kalu. Nginak lok itu, Harianto langsung nyambar pisau lah pak pelapas nebas pule. Die betitip ngak adek sanak duson laman rugok kampoh, khususnye ndik di Kecamatan Mulak Ulu. Bahwesenye Kecamatan Mulak Sebingkai tu kele merupekah kecamatan baru, cengki pule banyak kekurangannye dimane-mane, uli karne itu masyarakat harus semangat, mangke pacak njadikah grumah sekulah SMK tu gancang tetegak.
“Aku beterime kaseh nian ngak adek sanak. Pemerintah Kabupaten Lahat ndukong nian semangat adek sanak nak negakkah sekulahan di sini. Mintak-mintaklah gancang tebangun”, uji Harianto ngumong ngak masyarakat dang ngubrol di badah nebas tu.
Harianto nyampaikah, tekabulnye niat masyarakat nak mewujudkah pemekaran Kecamatan Mulak Sebingkai itu, dek kucil isak di campur tangan Bupati Lahat, H. Aswari Riva’i, SE. Ini tande terime kaseh die lah due rimbak njadi Bupati Lahat. Ade pule kabar rencane Bupati Lahat ni kah ncalon pule nak jadi gubernur di sumatera selatan ini nek periode 2018-2023 diancap.
“Kite beterime kasih dengan Bupati Lahat yang lah beusaha, bejuang kandek pemekaran ini. Mangkenye kite doakah H.Saifudin Aswari Riva’i, ni njadi Gubernur Sum-Sel”, kate die.
Ade pule dak kecik masih sekolah SMA bename Mamat (16), bugagh ini ngicekkah ribang nian nginak Pak Sekda tu ade di lokasi. Uji Mamat die ngaghapkah nian pembangunan sekulahan SMK tu kele gancang digawekah.
“Ai amu Sekda lah datang nian ke lokasi ni, mudah mudahan secepate dibangun sekulahan SMK tu kele, mangke parak badah kami sekolah”, kate budak ni, lok lah merencanekah nak ngaleih badah sekulah. (Adv/Kominfo)
Jeme Ngerawatinye : Yadi
