Lahat Hotline
Related Articles
MULAK ULU, LhL – Mpok lom keruan nian tanggal ngak aghinye, rugok kampoh, adek sanak, duson laman, kundang kance, petue marge sampai ke dak kecik di Kecamatan Mulak Ulu, Kota Agung ngak Kecamatan Pagar Gunung, lah besesiap nak nunton filam Si Bolang, ye mpai udem disuteng di Duson Geramat, beghape bulan ni tadi.
Kabare, filam ye nceritekah penggwehaan dak kecik Duson Geramat, nye dinamei Si Bolang Lahat itu kah diligatkah jeme taksiun tivi Tran7 ngepungan bulan 11 ni lah. Anye lom keruan nian kebile tipate aghi ngak tanggale mangke filam tu diligatkah, awak nye di Duson Lubok Sele ,Gumay Ulu lah lame udem diligat li jem.
Temasuk pule Camat Mulak Ulu, Miharta SE. Lanang ini memikut nak nginak nian tayangan filam Si Bolang sak di Duson Geramat, Kecamatan Mulak Ulu tu. Miharta ni ngakok, die penasaran benagh ngak filam ye di suteng di wilayah kecamatan die betugas ini.
“Nggok mak ini aghi aku masih nunggukanye, kebile nian mangke filam Si Bolang nye dibuat tukang suteng di Duson Geramat, Kecamatan Mulak Ulu tu di ligakkah di tivi. Kerne amun jiku, filam itu lah temasuk dalam “Tata Karya” bemacam macam mainan dak kecik (Si Bolang) empat ughang itu”, Ji Miharta ni becerita ngak tukang berita Lahat Hotline.com akap tadi, Minggu (30/10).
Udem itu, Miharta ngulang ngumong, dengan adenye filam Si Bolang di Duson Geramat ini, pacak pacak mbatak name Kecamatan Mulak Ulu tedengagh nggok ke badah badah jeme di jaoh tu.
“Temasuk pule name Kabupaaten Lahat ni dikenal jeme jauh pule, sebab budaya ngak wisata asli kite isak di lahat ni lah tebatak di filam Si Bolang tu”, kate die.
Selain di Miharta, ade pule Isyroni, Camat Pagar Gunung. Die ni lah lame pule nunggukah kebile nian mangke filam Si Bolang, ye sigat di suteng jeme selame ni tadi mangke ngancal di tivi Tran7 tu.
“Nye lah cengki nian, kite semangat gale ndukung raban tukang suteng tu mbuat filam Si Bolang mada’e. Nah mak ini aghi, lah tipatanye pule kite betetungguan nak nginak’i filam itu diligatkah jeme di tivi. Anye cerita yang ku aningi, base filam Si Bolang ini nceritakah tentang care mainan budak kecik jaman di kale, sebelum jaman modiren ni. Nah itulah nye mbuat aku penasaran dek tau urong nian nak nuntone”, akok’an Isyroni.
Nggambare : (MAN)
Tukang Nulise : (MAN) pule
Nye Beghilok : (UJANG, SP)
