Home / Umum / NGAGHAPKAH NAK WARI NCALON GUBERNUR

NGAGHAPKAH NAK WARI NCALON GUBERNUR

LAHAT, LhL – Nak mileh ngak dide, sape kina calon pemimpin ni memang hak jeme masing masing. Cuman ntah nian, tuape die ye ade di rupo’an Siti Yunah ni. Kerbai jande beumur lah ampir 70 taon, ye bealamat di Kelurahan Bideng Bandar Agung, Kecamatan Kota Lahat ini, besigat ngatekah “Aku ngaghap nian nak Wari ncalon gubernur” di pemilihan gubernur sumatera selatan taun 2018 diarap.

Amun uji nineng tue nye biase dipantau jeme Yut ni, base Bupati Lahat mak ini aghi bename Aswari Riva’i tu besak benagh jasahe ngak die. Sebab jinye, lah bepuloh taon die ngidamkah nak pegi ke tanah suci di Mekkah. Nah pas ade program umroh sak di pemerintah Kabupaten Lahat, Bupatie Aswari Riva’i, mangke di taon 2013 madak’e die ghule kesempatan ngikut umroh. Kebetulan base nineng lah becucung katah ni, guru ngaji pule.

“Udem itu bukan li itu saje, kalu kukinak di duson kami di Lubuk Atung, Kecamatan Pseksu, Kabupaten Lahat tu. Nak Wari ni lah ghapat pule ndatangi adek sanak ye sare sare tu, bukan cuman ngenjuk rezeki, nak Wari ni sayang benagh ngak jeme jeme tue, ngak budak kecik temasuk pule bujang gadise di duson itu. Ku dengagh dengagh cerite jeme, engkase Nak Wari ni mimeng ilok ndie ngak gegale jeme, mpok di daerah daerah lain lok itulah pule”, ceritean Ning Yut, waktu di ajak becerite li Lahat Hotline pas die dang makan di ghumahe, Selasa (27/9).

Baca Juga  WASIT DAN JURI TINJU PORPROV SUMSEL 2017 DINILAI CURANG

Dindak tebudi li umongan Ning Yut ni, tukang tulis kabar Lahat Hotline laju ndatangi duson Lubuk Atung ye di ceritekah li Nineng belaki pensiunan PJKA ni, ndek mbuktikah ceritenye tentang ke ilokan Wari di duson itu.

Sate lah di duson itu, ngguk nian. Tukang tulis kabar ni langsung betemu ngak Ning Daimah, ye panjang libagh nceritekah penggawehan Wari kebile die datang ke duson itu. Uji Ning Daimah ni, waktu Wari datang ke duson itu, sate nginak aku dang dudok di ante’an Wari tu langsung nggaghi, nyalami, dipeloknye.

“Aku dide keruan base lanang itu Wari Bepati kite, anye die galak nyalami kami. Udem itu, ke pegilah Wari ni nyelipkah pule rezekinye dikit ngak kami. Uji Wari bebagi ghase, kalu pacak ndek aku bejajan”, ji Nineng lah berumur amper 89 taon ni, becerite ngak tukang kabar.

Baca Juga  Dihadiri Dua Kepala Daerah, Ario Dilantik Ketua SMSI Luak 50

Lah udem nanyei Ning Daimah, tukang kabar ni ngulang ncakaghi jeme ye diceriekah li Ning Yut tadi. Lum lame itu, lah tepupok pule ngak lanang tukang ngisek kayu di duson Bemban tu bename Inok. Nurut ceritean bugagh ini, sate Wari datang ke dusone tu Wari ngantatkah mulan ikan kandek ngisi lubok larangan di Ayek Jelatang duson itu.

“Kalu dek salah, udem ngenjukkah mulan ikan tu, Wari bejanji ke ngenjukkah semen 50 sak nak nulong karang taruna ngalapi lapangan bal puli. Nah, sebulan lebeh diket lah datang nian jeme sak di dinas olahraga ngantatkah semen. Injek nian budak budak mude dienjuk semen ndek ngalapi langan bal puli tu”, kate Inok, becerite sambil ngengaoh, badan penuh li miang kayu, mane bepulegh ngak minyak oli dainye.

Gambare : (Memaul Lahat Hotline Kikim Area/Sony)

Tulisane   : (UJANG, SP)

Check Also

PENGUMUMAM TES TERTULIS SELEKSI CALON ANGGOTA PANWASCAM LAHAT 2024

Baca Juga  PASCA LEBARAN, GUNUNG DEMPO DIGANDRUNGI WISATAWAN

SMM Panel

APK

Jasa SEO